Komite 12 Novembru Sorumutuk ho ESTATAL - SEJD

Prepara Ba Loron Juventude, Komite 12 Novembru Sorumutuk ho ESTATAL-SEJD

DILI – Prepara ba komemora loron nasional ba juventude 12 Novembru tinan nee, Komite 12 Novembru halao sorumutuk ida ho Ministru Administrasaun ESTATAL ho Sekretariu Estadu Juventude no Desportu (SEJD).

“12 Novembru hanesan loron nasional dedikadu ba iha juventude nudar loron juventude nian. Komemorasan nee sei tuir buat nebee mak lei haruka. Klaru katak, governu mos iha nia programa respeita lei sira nee, tanba nee mak tenki halo koordenasaun ho kooperasaun para buat sira nee bele lao,” dehan Prezidenti Komisaun Organizadora Komite 12 Novembru, Jacinto Alves ba jornalista sira hafoin remata sorumutuk ho Ministru ESTATAL, Jorge Teme ho Sekertariu Estadu Joventude no Desportu (SEJD), Miguel Manetelu iha Kaikoli-Dili, Segunda (08/10).

Jacinto dehan, komisaun labele lao sem apoio husi parte governu nian. Governu mos hakarak nafatin parseria ho komisaun ba eventu ida nee para prosesu nee bele lao ba oin. Tanba buat sira nee liga ho eventu internasional, entaun proposta ba iha orsamentu neebe maka tama inisial U$ 13 mil e tal nebee iha atividades barak mak sei halao, maibe ida nee resposta husi governu, needuni sei halao reuniaun fila fali hodi hare programa saida maka atu halao no saida mak labele.

Tuir Jacinto, komemorasaun 12 Novembru tinan nee tenki fo imajen ba buat hotu nebee akontese ba manifestasaun 12 Novembru iha Santa Cruz. Iha akontesementu 28 Outubru nian nee maka hamosu 12 Novembru, nunee mos iha 19 Novembru akontesimentu iha Jakarta, depois too mai iha Lusitania Expresso sira nia asaun.

“Ita hare iha buat hirak nee saida mak bele transparensia iha eventu sira nee, 12 Novembru halo, 28 de Outubru mosu nunee mos preparasaun ba iha vizita. Needuni saida mak hakarak hatoo husi asaun sira nee, inkluzivamente ba iha misaun Lusitania Expresso nebee ema hotu kompostu husi pais 23 nebee mak iha roo ahi nia laran,” haktuir Jacinto. Nia esplika, saida mak hakarak hatoo iha misaun sira nee mak, de facto buat nebee relasiona ho kazu Timor nia ema haluha tiha entaun liu husi asaun sira, bele konsege rekopera fali situasaun Timor nian iha ajenda forum internasional nebee ita hetan resposta maka ho imajen husi Lucitania Expresso nian.

“Iha eventu nee alende ita halo komemorasaun ba loron ida nee, ita sei halo mos konferensia internasional ida nebee maka involve sira nee hotu nebee maka ita hakarak mos konvida Komandante Roo-ahi Yo-Sudarso, hakarak mos konvida jornalista sira nebee maka halo kobertura ba iha atividades 12 Novembru nian, see sira hakarak mai. Saida maka ita hakarak hasai iha konferensia nee maka akta ida nebee maka hanesan rezultadu husi konferensia nee rasik,” afirma Jacinto.

Alen de konferensia, hateten Jacinto, Komite 12 Novembru mos sei halo expozisaun ida nebee ke fo nafatin imajen jeral kona ba akontesementu 12 Novembru nian. Iha fatin hanesan, Ministru ESTATAL, Jorge Teme, dehan, governu liu husi Ministeriu Administrasaun ESTATAL aloka ona orsamentu ba komemorasaun 12 Novembru.

“Ami sei despaixu orsamentu nebee iha, konforme nesesidade liu-liu ministeriu administrasaun ESTATAL, atu suporta liu ba iha konferensia internasional no expozisaun, ida nee ami hetan karta husi Primeiru Ministru, needuni tanba orsamentu aloka tuir Ministeriu ESTATAL, entaun ami sei apoio,” Teme dehan.

Orsamentu ho nia total U$ 100 mil hodi bele halao atividade konferensia internasional, tanba nee momentu ida atu hatudu ba mundu katak, tinan 20 ona TL komemora prezensa misaun paz iha Timor-Leste.

Entretantu SEJD, Miguel Manetelu hateten, “hau hanoin orsamentu nebee ba iha komemorasaun 12 Novembru nee laos foin aloka iha tinan ida nee, maibe tinan-tinan desde primeiru governu konstitusional mesmu ke uitoan mas ita aloka bebeik”.

Osan nebee tinan-tinan aloka aloka ba iha Komemorasaun 12 Novembru hanesan loron nasional juventude nian i osan sira nee aloka tanba atividades sira nee sei komemora hotu iha Sub Distritu. Tanba nee maka iha reuniaun koordenasaun nee husu ba komisaun atu hatuur atividades hotu iha orsamentu nebee alokadu tiha ona no aprova husi Parlamentu Nasional. lia/luc

STL, 8 Outubro 2012

http://www.suara-timor-lorosae.com/jornal/

berita-16157-prepara-ba-loron-juventude-komite-12-novembru-sorumutuk-ho-estatalsejd-.html