Sekretariu Estadu Antigus Combatentes Libertasaun Nasional (SEACLN), Julio da Costa “Meta Malik”, ameasa atu tais veteranus falsu iha Timor laran tomak, atu nune’e labele iha tan manipulasaun, dehan Meta Malik ba Timor Post iha nia servisu fatin MSS, segunda (11/2).
“Meta Malik” hateten, agora dadaun, sira sei loke fali lista pagamentu tanba identifika veteranus barak falsifika dokumentus no aproveita tempu hodi hetan direitu ba pagamentu.
Ne’e duni, Governu liu husi konsellu veteranus sei tais no lori ema hirak ne’ebe falsifika dokumentus ba hatan iha Tribunal. Ema ne’ebe deklara an hanesan veteranus tenki deklara loloos katak iha ailaran tinan hira, no katigu iha ne’ebe, kastigu tinan hira, destera karik destera iha fatin ne’ebe tenki fo deklarasaun loloos.
“Kuandu identifika loloos katak, iha ema balun falsifika dokumentus hodi simu fali direitu ema seluk nian maka tenki ba hatan iha Tribunal,” dehan Malik.
Iha oportunidade ne’e, Meta Malik husu ba veteranus hotu atu hatudu justica, hodi nune’e labele hamatak fali ema seluk nia direitu, tanba osan ne’e osan matebian nian, hanesan veteranus ne’ebe fo kontribuisaun ba ukun rasik an tenki hatudu honestidade hodi defende buat neebe los no justu para labele bosok tun sa’e.
Timor Post
12 Fevereiru 2013
Sem comentários:
Enviar um comentário