PM Xanana: CPD Lalika Halimar ho Ha’u

Husi: Estajiariu

Jornal Independente

7 Marsu 2013

Foto Jornal Independente (FB)

Dili: Primeiru Ministru Kay Rala Xanana Gusmão husu grupu Conselho Popular Demokratika-Republika Demokratika Timor-Leste (CPD-RDTL) atu lalika halimar ho estatutu seluk ne’ebé konsidera hanesan anti konstituisaun RDTL.

“Se CPD-RDTL hanoin nia estatutu seluk, ida ne’e inkonstitusional, ha’u la dehan illegal, ha’u dehan inkonstitusional, anti ita nia konstituisaun, labele mai ko’alia fali konstituisaun ho ha’u tanba la’os ha’u mak halo konstituisaun, labele mai fali ko’alia leis ho ha’u tanba sira la simu, sira la vota, enkuantu sira nia lider balun vota hela, iha hela kartaun (eleitoral), iha pasaporte ba pasiar iha liur, balun servisu hela, ha’u koñese professor balun CPD-RDTL, i depois simu hela osan estadu, reklama tan sira nia direitu depois hanorin ita nia povu ne’ebé simples teb-tebes dehan katak ita mak restaura,” deklara PM Xanana hafoin halo enkontru ho Prezidente Repúblika iha Palasiu PR, horisehik.

Maski nune’e, PM Xanana admira ho dixiplina no mobilizasaun ema ne’ebé grupu CPD halo, maibé nia labele permiti atu CPD ba okupa fali ema nia rai.

“Ne’e duni ha’u dehan ba Prezidente Repúblika (Taur Matan Ruak) katak ami sei hasai (CPD-RDTL) sira husi ne’ebá, sei la oho, sei la book, sira sai husi ne’ebá,” “Ha’u uluk FRETILIN, ha’u uluk membru Comite Central FRETILIN, (maibé) ha’u nunka reklama katak ha’u fundadór, ha’u labele, se dehan katak ha’u kontinua duru, ha’u bele simu, ha’u nunka bele dehan katak ha’u mak diresaun superior husi 1974, lae, ha’u tama ikus.”

“Se temi baze de apoiu, ha’u mós iha baze de apoiu, atu temi reorganizasaun luta, ha’u mak reorganiza, ne’ebé lalika, ho ha’u lalika halimar,” hateten xefe governu ne’e.

Xanana dehan, governu harii ona komisaun ida hodi halo kalku ba produtu ne’ebé grupu CPD sira produs iha Welaluhu atu sosa.

“Ami harii ona komisaun ida, atu estuda, atu haree took, halo kalku ida katak iha ne’ebá sei sai tonelada hira, estadu sei sosa, envez sosa husi fatin seluk, sei sosa husi ne’ebá, sira sai, ami sei sosa,” deklara Xanana.

Nune’e, governu tau ona osan atu apoiu CPD sira hodi halo kooperativa iha ida-idak nia distritu, no prepara mós osan atu sosa fini.

“MAP sei fó ajuda ba sira mais iha ida-idak nia fatin, ida ne’e mak ita dehan katak ita hotu tuir lei, ita hotu respeita lei,” dehan nia.

“Sira ba tiha, ba fali sira nia fatin, halo kooperativa ne’ebé ami atu fó apoiu, iha ne’ebá sira kuandu hakarak, husu mós para aseita ona ejistensia estadu ida ne’e karik sira bele.”

“Agora sira tenke organiza aan hodi aplika enerjia, sira nia kbiit mobiliza, kbiit dixiplina iha fatin hotu-hotu, labele ita ba fatin seluk, ita dehan rai ne’e ami nian, la di’ak,” katak PM Xanana.

JI