“Veteranus hotu ejiji nia kolen, agora dadauk ne’e problema veteranus halo estadu ulun moras, tanba problema veteranus ne’e barak tebes, maibe veteranus sira hau dehan ba imi, hau la tau matan tan ona ba imi,” hateten Primeiru Ministru (PM) Kay Rala Xanana Gusmao iha dialogu konjunta divulgasaun planu no programa desentralizasaun Kamara Munisipiu, iha salaun Administrador Distritu Viqueque (15/5).
Xefi Governu ne’e esplika, wainhira veteranu sira kontinua protesta malu kona ba osan, entaun problema veteranus ne’e sei sai kumplikadu boot liu tan ba estadu ida ne’e. “Kuandu hanesan ne’e hela deit, loro-loron mak protesta malu hela deit kona-ba osan atu selu imi, entaun problema veteranus ne’e sei sai komplikadu boot ba estadu ida ne’e,” Xanana akresenta.
Xanana hatutan katak, Governu kria ona komisaun ritual permanente ida atu haree konaba problema veteranus nia ne’e, maibe la konsege rejolve, maibe aumenta tan problema ba estadu.
.
“Problemas veteranus ne’e la’os iha Distritu Viqueque de’it, tanba laos Viqueque de’it mak halo funu, maibe fatin hotu-hotu halo funu,” Xanana akresenta.
Xefi Governu ne’ebe nu’udar lider rejistensia koalia katak, problema veteranus to’o agora governu la konsege rezolve, tanba ema hotu-hotu uza ninia direitu hodi simu pensaun husi governu.
Xanana mos haklaken katak, veteranus sira ne’ebe uluk unidade no hatudu sira nia nasionalizmu hodi liberta rai ida ne’e, agora sai fali ema ne’ebe la fo ezemplo diak ba joven sira buat ne’ebe diak hanesan uluk.
“Uluk imi hanorin ami kapaas, ami respeita imi teb-tebes, maibe to’o ikus mai imi hanorin fali ami buat ne’ebe aat, imi veteranus moe la iha,” afirma Xanana. Iha okaziaun ne’e, reprezetante veteranus Distritu Viqueque, Adriano camara esklarese katak, durante ne’e veteranus mos halo hela korupsaun hasoru estadu soberanu liu husi dadus falsu ne’ebe mak veteranus sira aprezenta ba iha komisaun eventual.
“Veteranus iha Viqueque rasik durante ne’e inventa buat barak no halo buat barak liu husi korrupsaun ba ona estadu nian,” dehan Adriano Camara.
Tuir Adriano Camara, veteranus tenki hatudu nia sala, tanba durante ne’e lista veteranus barak mak falsu, hahalok sira ne’e mosu para atu hetan osan estadu nian deit. “Tinan 3 de’it ninia partisipasaun dala barak sai fali 8-14, tinan 5 partisipasaun sai fali ba 15-19,” nia afirma.
Adriano Camara dehan tan, dala barak veteranus mak hakilar governu halo korupsaun, maibe veteranus rasik mak agora komete iha korupsaun.
“Ami veteranus oras ne’e la iha sentimentu, hakfodak de’it ba osan veteranus falsu barak mos mosu, osan rihun ba rihun mak fakar ba veteranus sira,” Adriano hateten.
Adriano camara koalia liu tan katak, akontesementu ne’e mosu tanba estadu rasik la konese ninia ema, tanba ne’e ema barak aproveita.
- 17 Maiu 2013
JND Jornal Nacional Diario
Sem comentários:
Enviar um comentário